اصعب اختيار

تفضل تكون عاطل وشريف مجهول ولا حرامى نصاب مشهور ؟ تفضل تكون على باب الله موظف بتحب القيم وبتتشعبط فى الأتوبيس مطحون ولا تاجر غشاش بتجمع الفلوس بالكوم ؟ تفضل تكون عالم ومثقف ومفكر ذو مبدأ بس متقيد ولا صاحب مركز وليك كلمة ظالم مفترى وحر وبتتصدق ؟ تفضل تكون انسان عادى بتحب الناس وبتنادى للسلام وسعتها هنترحم عليك ولا متطرف وبتطيح فى الناس ومحدش قادر عليك ؟ تفضل تكون جبان واقف ورى الباب راضى على حالك بتبوس الأيدين ولا قوى البنيان رافع الراس ماشى ضد التيار حتى لو اندست تحت الرجلين ؟

انت فى بلدك متخفش اتكلم برحتك واختار اللى يناسبك ....

بس اعرف ان فى مَثل بيقول اللى ميرضاش بالخوخ يرضى بشرابه ومن اختيار لأختيار ياقلبى لا تحزن انا عارفة انه صعب عليك ان تاخد اصعب قرار فى حياتك قراراً مهم يتوقف عليه مستقبلك ومستقبل اللى حواليك ولكن فى ظل هذه الأختيارت تسألك حكومتك وتخليك تختار دى سايبة ليك مساحة كبيرة للتفكير والتمعين فى اتخاذ اصعب قرار مانت عارف من طبيعتها ممارسة الحرية فى الرأى والديمقراطية ولا تظن السوء انها بتجبرك على احدى الأختيارين متعمدة الأجبار اوع تتخيل انها بتغصبك على الأختيار ولا بتقولك قدامك البحر والعدو وراك ولا تفكر ان ده معناه انك ميت ميت ولا تعتقد لمجرد الأعتقاد ان كل اختيار منهم زى الصدمة الكهربائية اللى هتؤدى بيك للهلاك ولما تسألك وتجبرك قصدى تخليك تختار يعنى بتخليك تمارس الحرية ما هى ام الأحرار قل لى ما هو اللى يناسب قدراتك وامكانياتك ؟ وهل اختيارك سيحقق اهدافك التى تسعى اليها ؟ مع العلم انها بتشاورلك بيديها وتقول لك بدون خسائر وتهديد للأمن العام ؟ مش بقولك ديمقراطية من يومها.

ديمقراطية ولكنها لم ولن تشعر بطبيعة وكينونة الأنسان ولا تعرفه حتى الأن ، فهى تجهله ولا تستطيع التكيف والتأقلم معه فلولا الأنسان لما كانت وكان ولا تفهم انه لابد من الأصغاء له جيدا وتحقيق رغباته وطموحه واستقراره الذى سيعود عليها بالنفع من تتطور وتقدم ولكنها للأسف كل هذا ضدها وده فى رأيها انا عارفة انى كنت قاسية عليك هعمل ايه ما انا بحاول اساعدك وجاوب على اسئلتك ان عارفة انك ساعات كتيرة بتسأل نفسك هو انا فين ؟ انا مين ؟ وهويتى ايه ؟ انا بقى هقولك بس من غير زعل وهاديك حاجات تساعدك على الأختيار لما تكون انسان مشوه مسلوب منك حقك الشرعى و لا يسمع احد صوتك مجهول مهمش إلا اذا احتاج اليك فى زفة الأنتخابات لما تجلس وحيدا عاطلا تكره ان يجيى عليك يوم جديدا لانك مشعارف هتعمل ايه فى اليوم ده وعيالك هيموتوا من الجوع ومش عارف تروح للبيت مكسوف منهم قليل الحيلة منفض اليدين لما تتخطف اختك وهى راجعة من الشغل ومتعرفشى راحت فين ولا ايه اللى جرى لها ولا لما تخش عليك عصابة يضربوا فيك لغايط ماتصرخ من كثرة الألم وتقول بعلو الصوت اه ومتلاقيش اللى ينجدك ولا حتى قانون ينصفك ولا لما حد يدخلك السجن ويخدوك ظلم وزور وافتراء ولا تتفقل كنيسة بتصلى فيها ويتهدم مبنى لخدمتك ولصحتك ولا ايه وايه وايه حاجات تخلى الأهات تملاء القلب والحزن يبكى العين ومفيش قدامك ياحبيبى غير احدى الأختيارين عرفت انت دلوقتى ايه وفين تبقى انت اكيد فى مصر وبتقولك اختار يابنى ومتخفش بس واقفة التانية بعيد بتشاورلك بالأيدين بدون خسائر علشان انت عارف ياحبيبى اللى هيحصل بعدين ....